Царква Пакрова Прасвятой Багародзіцы ў вёсцы Залессе Царкоўнае (Бушыкі) Дзісенскага павета. Фота Юрыя Дулевіча, 1928 год.
Упершыню Залеская царква згадваецца ў 1552 годзе. Але з крыніцы ясна вынікае, што яна існавала яшчэ як мінімум некалькі дзесяцігоддзяў (а можа і стагоддзяў - хто праверыць?) да гэтай згадкі. Царква была праваслаўнай, належала да Канстанцінопальскага патрыярхата.
У 1596 годзе праваслаўныя япіскапы ў Вялікім Княстве Літоўскім прынялі Унію з Апостальскай Сталіцай і царква стала ўніяцкай ці іначай грэка-каталіцкай - і заставалася такой да 1839 года, калі Унію ліквідавалі пад ціскам расійскага ўрада.
Першая царква была драўляная. У 1783 годзе была збудаваная мураваная царква. Як і іншыя святыні ў гэтым рэгіёне, будаваныя ў той час, яна была ў стылі барока.
У 1888 годзе царква была перабудаваная, а настаяцель дужа клапаціўся, каб надаць ёй "праваслаўны" выгляд. На яго абмежаваны погляд, праваслаўная святыня не магла быць у стылі барока - а абавязкова мусіла быць у так званым "рэтраспектыўна-рускім" стылі. Таму быў знесены барочны франтон над уваходам, перабудаваны дах і пастаўлены купал-"цыбуліна", дабудаваны прытвор, а зверху над ім - вежа-званіца. У такім выглядзе царква і засталася.
У час камуністычнай улады кіраўніца мясцовага калгаса хацела зачыніць царкву, а зрабіць у святыні склад угнаенняў. Камуністку ўдалося адгаварыць ад гэтага кроку, матывуючы тым, што царква стаіць на пагорку і на яго будзе цяжка ўз'ехаць. А праз нейкі час СССР распаўся і ўжо ніхто не перарабляе хрысціянскія святыні на калгасныя склады.
